മാറുന്ന ആഗോള സാഹചര്യത്തിൽ വിദ്യാഭ്യാസ മേഖലയിൽ ആർട്ടിഫിഷ്യൽ ഇന്റലിജൻസ് (AI) വരുത്തുന്ന വിപ്ലവകരമായ മാറ്റങ്ങൾ ഉൾക്കൊള്ളുന്നതിനായി ബി.എഡ്, എം.എഡ് വിദ്യാർത്ഥികൾക്കായി പ്രത്യേക പരിശീലന പരിപാടി സംഘടിപ്പിച്ചു. സൃഷ്ടി ഇന്നൊവേറ്റീവ്സിന്റെ ടീം ഇൻസ്പയറിന്റെ നേതൃത്വത്തിൽ നെടുംകുന്നം സെന്റ് ജോൺ ദ ബാപ്റ്റിസ്റ്റ് കോളേജ് ഓഫ് എജ്യുക്കേഷനിൽ (SJB College) വെച്ചാണ് ‘എഐ ഫോർ ടീച്ചേഴ്സ്’ എന്ന വിഷയത്തിൽ ഈ ആഡ്-ഓൺ പ്രോഗ്രാം നടത്തിയത്. കോളേജ് അഡ്മിനിസ്ട്രേറ്റർ കം പ്രിൻസിപ്പൽ ഡോ. (ഫാ.) ജോജിമോൻ ജോർജ് പരിപാടി ഉദ്ഘാടനം ചെയ്തു. ആധുനിക സാങ്കേതികവിദ്യ പ്രയോജനപ്പെടുത്തി അധ്യയന രീതികൾ പരിഷ്കരിക്കേണ്ടത് കാലഘട്ടത്തിന്റെ ആവശ്യമാണെന്ന് അദ്ദേഹം ഉദ്ഘാടന പ്രസംഗത്തിൽ ഓർമ്മിപ്പിച്ചു.
രണ്ടുദിവസങ്ങളിലായി കോളേജ് ഓഡിറ്റോറിയത്തിൽ നടന്ന ഓഫ്ലൈൻ സെഷനുകൾക്ക് സൃഷ്ടി ഇന്നൊവേറ്റീവിലെ വിദഗ്ധരായ വിഷ്ണു പ്രസാദ് എം.വി, സുജിത്ത് സുരേന്ദ്രൻ എന്നിവർ നേതൃത്വം നൽകി. അധ്യാപന പ്രക്രിയ ലളിതമാക്കാനും ക്ലാസ് മുറികളിൽ നൂതനമായ മാറ്റങ്ങൾ കൊണ്ടുവരാനും സഹായിക്കുന്ന ഏകദേശം അറുപതോളം എഐ ടൂളുകളാണ് വിദ്യാർത്ഥികൾക്ക് ഈ സെഷനിലൂടെ പരിചയപ്പെടുത്തിയത്. പാഠ്യപദ്ധതി ആസൂത്രണം ചെയ്യുന്നതിനും സെക്കൻഡുകൾക്കുള്ളിൽ ആകർഷകമായ പ്രസന്റേഷനുകളും മറ്റ് ഡിജിറ്റൽ കണ്ടന്റുകളും നിർമ്മിക്കുന്നതിനും ആവശ്യമായ പ്രായോഗിക പരിശീലനം വിദ്യാർത്ഥികൾക്ക് ലഭിച്ചു. ഓഫ്ലൈൻ ക്ലാസുകൾക്ക് പുറമെ, പഠിച്ച കാര്യങ്ങൾ വീണ്ടും പരിശീലിക്കുന്നതിനായി റെക്കോർഡ് ചെയ്ത വീഡിയോകളിലൂടെയുള്ള തുടർ പിന്തുണയും ടീം ഇൻസ്പയർ ഉറപ്പാക്കിയിട്ടുണ്ട്.
പരമ്പരാഗത പഠനരീതികളിൽ നിന്നും മാറി ഓരോ വിദ്യാർത്ഥിയുടെയും പഠനശേഷിക്കനുസരിച്ച് വ്യക്തിഗതമായ രീതികൾ (Personalized Learning) അവലംബിക്കാൻ എഐ അധ്യാപകരെ പ്രാപ്തരാക്കുന്നു. ഉത്തരക്കടലാസുകൾ കൃത്യമായി മൂല്യനിർണ്ണയം ചെയ്യാനും കുട്ടികൾക്ക് വേഗത്തിൽ ഫീഡ്ബാക്ക് നൽകാനും ഇത്തരം സാങ്കേതിക വിദ്യകൾ സഹായകരമാണ്. ബ്ലാക്ക് ബോർഡിൽ നിന്നും ഡിജിറ്റൽ സ്ക്രീനുകളിലേക്കും അവിടെനിന്ന് എഐ അധിഷ്ഠിത അധ്യയനത്തിലേക്കും വിദ്യാഭ്യാസരംഗം ചുവടുമാറുമ്പോൾ, പുതിയ കാലത്തെ അധ്യാപകർ ഇത്തരം സാങ്കേതികവിദ്യകളിൽ അറിവ് നേടേണ്ടത് അനിവാര്യമാണെന്ന് പരിശീലകർ ചൂണ്ടിക്കാട്ടി. ഭാവിയിൽ ക്ലാസ് മുറികളെ കൂടുതൽ സർഗ്ഗാത്മകവും വിജ്ഞാനപ്രദവുമാക്കാൻ ഈ പരിശീലനം വിദ്യാർത്ഥികളെ സഹായിക്കും.
