അമരാവതി: ആന്ധ്രാപ്രദേശിൽ എഥിലീൻ ഗ്ലൈക്കോൾ (Ethylene glycol) കലർന്ന പാൽ കുടിച്ച് ആറ് പേർ മരിച്ചു. പാൽ കഴിച്ചതിനെത്തുടർന്ന് ശാരീരിക അസ്വസ്ഥതകൾ അനുഭവപ്പെട്ട 15-ഓളം പേരെ തീവ്രപരിചരണ വിഭാഗത്തിൽ പ്രവേശിപ്പിച്ചു. ഇതിൽ പലരുടെയും നില അതീവ ഗുരുതരമായി തുടരുന്നതിനാൽ മരണസംഖ്യ ഇനിയും ഉയർന്നേക്കുമെന്നാണ് റിപ്പോർട്ടുകൾ.
അശ്രദ്ധയോ മനഃപൂർവ്വമോ? ഡയറി യൂണിറ്റിലെ പ്രവർത്തനച്ചെലവ് കുറയ്ക്കുന്നതിനായി ഫുഡ്-ഗ്രേഡ് കൂളന്റുകൾക്ക് പകരം എഥിലീൻ ഗ്ലൈക്കോൾ ഉപയോഗിച്ചതാകാം ദുരന്തത്തിന് കാരണമായതെന്നാണ് പ്രാഥമിക നിഗമനം. സംഭവത്തിൽ ഉന്നതതല അന്വേഷണത്തിന് ഉത്തരവിട്ട അധികൃതർ, പാലിന്റെ സാമ്പിളുകൾ പരിശോധനയ്ക്കായി ലാബിലേക്ക് അയച്ചു.
ധനസഹായം പ്രഖ്യാപിച്ചു മരിച്ചവരുടെ കുടുംബങ്ങൾക്ക് സംസ്ഥാന സർക്കാർ 10 ലക്ഷം രൂപ വീതം അടിയന്തര ധനസഹായം പ്രഖ്യാപിച്ചു. സംഭവത്തിൽ കുറ്റക്കാരായവർക്കെതിരെ കർശന നടപടി സ്വീകരിക്കുമെന്ന് മുഖ്യമന്ത്രി അറിയിച്ചു. ഡയറി യൂണിറ്റിന്റെ ലൈസൻസ് റദ്ദാക്കുന്നതുൾപ്പെടെയുള്ള നടപടികളിലേക്ക് അധികൃതർ നീങ്ങുകയാണ്.
