മുംബൈ: സൺറൈസേഴ്സ് ഹൈദരാബാദിനെതിരെയുള്ള ആവേശപ്പോരാട്ടത്തിൽ ലഖ്നൗ സൂപ്പർ ജയന്റ്സ് വിജയിച്ചെങ്കിലും, താരം ആവേശ് ഖാന്റെ അമിതാവേശം ടീമിന് തിരിച്ചടിയാകുമായിരുന്നു. മത്സരത്തിൽ ഋഷഭ് പന്തിന്റെ വിജയ ഷോട്ട് ബൗണ്ടറി കടക്കുന്നതിന് മുൻപേ ആവേശ് ഖാൻ പന്തിൽ തട്ടി ആഹ്ലാദം പ്രകടിപ്പിച്ചതാണ് വിവാദമായത്.
നിയമക്കുരുക്കിൽ നിന്ന് കഷ്ടിച്ച് രക്ഷപെട്ടു
എംസിസി (MCC) നിയമം 20.4.2 പ്രകാരം, കളി നടക്കുന്നതിനിടയിൽ പുറത്തുനിന്നുള്ള ഒരാളോ അല്ലെങ്കിൽ ബാറ്റിംഗ് വശത്തുള്ള മറ്റ് താരങ്ങളോ പന്തിൽ സ്പർശിച്ചാൽ അത് ‘ഡെഡ് ബോൾ’ (Dead Ball) ആയി പ്രഖ്യാപിക്കാൻ അമ്പയർക്ക് അധികാരമുണ്ട്. ഋഷഭ് പന്തിന്റെ ഷോട്ട് ഫോർ ആകുന്നതിന് മുൻപേ ആവേശ് ഖാൻ പന്ത് തട്ടിമാറ്റിയത് കളിയിലെ ഇടപെടലായി കണക്കാക്കാമായിരുന്നു.
അപ്പീൽ നൽകാതെ ഹൈദരാബാദ്
ഭാഗ്യം കൊണ്ട് സൺറൈസേഴ്സ് താരങ്ങൾ ഇതിനെതിരെ അപ്പീൽ നൽകുകയോ അമ്പയർമാർ സ്വമേധയാ നടപടിയെടുക്കുകയോ ചെയ്തില്ല. അല്ലാത്തപക്ഷം ആ പന്ത് ഡെഡ് ബോൾ ആകുകയും ലഖ്നൗവിന് ആ റൺസ് നഷ്ടപ്പെടുകയും ചെയ്യുമായിരുന്നു. ജയത്തിനടുത്തെത്തിയ മത്സരത്തിൽ ഇത്തരം അശ്രദ്ധകൾ വലിയ വില നൽകേണ്ടി വരുമായിരുന്നുവെന്ന് ക്രിക്കറ്റ് നിരീക്ഷകർ ചൂണ്ടിക്കാട്ടുന്നു.
